VIGAN CITY – Binalakadan ni Iloilo 1st District Rep. Janette Garin iti publiko a saan pay a napaneknekan a makaagas iti dengue ti siling labuyo ken dadduma pay a mula a kas iti tawa-tawa iti baet ti posible a panagadu ti kaso ti dengue ita a panawen ti panagtutudo.
Segun kenkuana, saan a mamati kadagiti online post a mangibagbaga a makaagas ti siling labuyo iti dengue ta awan iti pakaibasaran a medical research a makaagas iti siling labuyo, ken awan pay ti napaneknekan nga agas ti dengue agingga ita.
Innayonna pay nga awan kapagpaysuananna ti pammati dagiti tattao a makaagas wenno makalaban iti dengue ti siling labuyo, tawa-tawa wenno virgin coconut oil.
Kabayatanna, kinuna iti DOH, mabalin a kualipikado ti tawa-tawa a mairehistro iti Food and Drug Administration kas tradisional a herbal product para iti gurigor.
Nupay kasta, basar ti panagadal ti Acta Medica Philippina saan nga umdas ti tawa-tawa a makaagas a iti dengue, conjunctivitis, uyek, diabetes kasta met ti malaria, gastritis ken diarrhea.
