VIGAN CITY – Awan ti kainaigan ti panagkaan ti sili iti panagalmuranas wenno hemorrhoid ti maysa a tao a kas ti pammati ti kaadoan nga isu ti rason ti pagsagabaan.
Iti pannaki-uman ti Bombo Radyo Vigan ken ni Dr. Niño Realin, masapul nga adadu ti fiber a kanen tapno nasaysayaat ti panagrugit ken saan a marigatan.
Segun ken ni Dr. Realin, nu husto laeng ti maipapauneg a fiber iti bagi ket saan nga agsagaba ket nu agibleng, saan nga agiddek, saan a na-stretch dagiti urat, ken ma-preserve ti elasticity ti urat.
Inlawlawagna a maala ti almuranas nu masansan nga agiddek, napaut nga agibleng, kanayon nga agbagkat, masikog, agkurang ti fiber iti bagina, ken dadduma pay.
Kinunana pay nga adda ti Grade 1-4 a lebel ti panagalmuranas ta nu Grade 1 ken 2 pay laeng ket mabalin a mabalakan laeng dagiti liklikan ta saan unay a nakaru ta mabalin pay nga isubli nu bimmaba ti hemorrhoid idinto a ti Grade 3 ken 4 ket nakarun ta masapulen a maoperar.
VIDEO – DR. NIÑO REALIN
