VIGAN CITY – Mabalud ti tallo a bulan ken agmuelta ti 206 Euro wennu katukad ti nasurok a PHP 11,000 iti dusa dagiti tattao nga aglabsing iti naiyetnag a pagannurutan idiay Italy nangruna kadagiti lugar a naisakup ti lockdown gapu ti coronavirus disease 2019.
Dayta iti pinasingkedan ni Bombo International Correspondent Analiza Bueno a taga- Batangas City ngem agnanaed ken agtrabtrabaho idiay Rome, Italy kas executive employee ti center for employment and Service for Nationals Migrant Consultant iti report na ti Bombo Radyo Vigan.
Saan laengen a dagiti adda idiay Lombardy region, nangruna idiay Milan iti agpanpanic nu di ket uray dagiti adda iti sabali a paset ti Italy agsipud ta napaspas iti panagadu ti bilang dagiti pasyente nga apektado ti COVID- 19 ken dagiti matmatay.
Agsipud iti dayta, adun dagiti Pilipino a naawanan iti pagsapulan ngem segun ken ni Bueno, mabalin da latta a maka-ala iti suweldo da uray nu saan da a sumrek iti trabaho agsipud ta saan da met a basol nu apay nga awan ti trabaho da.
Mainaig dayta, nakasagana iti opisina da Bueno a mangted iti naan-anay a tulong nu bilang adda dagiti Pinoy nga agreklamo ken mangala iti benepisyo da kabayatan iti temporaryo a pannakaipasardeng iti trabaho gapu ti nasao a virus.
Ti kaudian a report ni Bueno ti Bombo Radyo Vigan, nakalock-down’n iti intero a pagilian ti Italya ket idiay Rome nga ayan da, limitado laengen dagiti mangmangged a mapalubusan a sumrek kadagiti trabaho da.
