VIGAN CITY – Nagballaag ni Provincial Quarantine Officer Martel Quitoriano kadagiti agbi-biahe iti nadumaduma a produkto iti Ilocos Sur a saanda nga agaramid iti maikaniwas ta saanda a makalibas.
Iti pannaki-uman iti Bombo Radyo Vigan ken ni Quitoriano, siguraduenna a ma-inspeksyon amin a dumalyasat kadagiti border iti probinsia tapno saan a makalibas dagiti agaramid iti maikaniwas kasaruno iti pannakakemmegda iti dua a lalaki a nanginayon iti saan a dokumentado a produkto iti manok idiay Brgy. Bio Tagudin.
Nabigbig dagiti nakemmeg a da Robert Gatchalian Mapanao, agtawen ti duapulo ket dua, baro, agnaed idiay San Benito Norte, Aringay, La Union a nagmaneho iti Mitsubishi Ref Van Truck kaduana ti helper-na a ni Melvin Baoing Salva, agtawen ti duapulo ket dua, baro nga agnaed idiay Alipangpang, Pozorrubio, Pangasinan a naglabsing iti Sec 4 iti paragraph b ken g iti Provincial Ordinance No. 15-06 Series of 2015.
Segun ken ni Quitoriano, ti nasalamaanda a truck ket naglaon iti umabot siam a pulo a karton iti chicken products ta pitopulo ket dua a karton wenno 1080 kilo iti chicken tails ken sangapulo ket walo wenno 180 kilo ti chicken wings.
Iti agdama ket addan iti kustodia iti Animal Quarantine dagiti nakemmeg tapno dumalan iti husto a proseso.
