VIGAN CITY – Siam a nagsusugal ti nakemmeg iti Anti-Illegal Gambling operation idiay Brgy Apatot, San Esteban ket sangwenda ti kaso a panaglabsing iti Presidential Decree 1602 wenno Anti-Illegal Gambling Act.
Nabigbig dagiti suspek a da Aida Quilaosing Bermejo, agtawen iti pitopulo; Lory Bermejo Cadano, agtawen iti innem a pulo ket dua; Laureta Timoteo Eligio, agtawen iti pitopulo ket walo; Carlina Eligio Dasalla, agtawen iti innem a pulo ket innem; Nellie Molina Medina, agtawen iti limapulo ket dua ken ni Eluminada Amano Bermejo, agtawen iti limapulo ket uppat.
Nakemmeg pay da Mylene Palino Quilaosing, agtawen iti tallopulo ket pito, Jose Laureta Eligio, agtawen iti walopulo ket lima ken ni Kimberly Cañas, agtawen iti duapulo ket maysa, agpapada amin a residente iti nasao a lugar ken naaktuan nga agtotong-it.
Naala manipud iti maysa a lamisaan a nagsusugalan dagiti suspek iti maysa a set ti baraha, pusta a PHP545, iti maikadua a lamisaan ket naala iti uppat a pulo a piraso ti baraha ken pusta a PHP313 idinto nga iti maikatlo a lamisaan ket naala ti maysa a set ti baraha ken pusta a PHP110.
