Mangiruar ti Land Transportation Franchising and Regulatory Board (LTFRB) ti show cause orders kontra kadagiti operator iti bus ken dadduma pay a pampubliko a lugan kalpasan a nagpositibo ti illegal a droga ti driver-da iti naisayangkat a nationwide drug testing idi April 16, 2025.
Ti surprise drug testing ket insayangkat ti Philippine Drug Enforcement Agency (PDEA) iti salinong ti Oplan Harabas a napasamak kadagiti kangrunaan a terminal iti pampubliko a transportasyon iti intero a pagilian.
Walopulo ket innem manipod 3,270 nga indibidual iti nagpositibo ket walopulo ket uppat a driver iti public utility vehicles idinto a dua iti conductor.
Karaman kadagiti nagpositibo ti sangapulo ket tallo a bus drivers, maysa a mini-bus driver, sangapulo ket siam a jeepney drivers, uppat a pulo ket pito a tricycle drivers, maysa a taxi driver, dua a motorcycle taxi drivers ken sangapulo ket maysa iti UV Express drivers.
Segun ken ni LTFRB Chairperson Atty. Teofilo Guadiz III, seryoso iti ahensya iti panagtignay kontra kadagiti aglablabsing iti linteg ken agbibiahe a mangmangted iti peggad ti kinatalged dagiti umili.
Innayonna nga obligasyon dagiti operator a siguradoen a dagiti driver ket nasayaat ti pisikal ken mental-da para iti panagmaneho.
