VIGAN CITY – Kinissayan ti Commission on Elections ti panawen a mangipalubos ti pannaka-withdraw ti Certificate of Candidacy dagiti kumandidato ken ti pannakaipila dagiti mangsukat kadakuada para iti 2025 elections.
Segun kenni Comelec Chairman George Erwin Garcia, ti addang ket tapno malapdan ti pananggundaway dagiti political groups ken ti panangallilawda kadagiti tao nu siasino ti pudno a kumandidato.
Kunana nga agingga laeng iti October 8 ti kitkitaenda para ti panangipila ti certificate of candidacy ta nu malpas dayta nga aldaw, awanen ti maipalubos a masuktan malaksid laengen kadagiti kaso ti pannakatay wenno disqualification ti maysa a kandidato.
Idi 2022 elections, nakairekord ti Comelec ti sangapulo a substitute candidates, ken sangapulo ket lima nga aspirants a nangi-withdraw ti certificate of candidacy’da iti nagbaetan ti October 9 agingga November 15,2021.
