VIGAN CITY – Maisagsaganan ti kaso a sangwen ti maysa a lalaki a nangpangta iti maysa a senior citizen idiay Personal Collection Products, Barangay San Jose, Candon City, Ilocos Sur.
Nabigbig ti suspek a n Wilson Fang Daclan, agtawen iti uppat a pulo ket uppat, dati nga empleado ti Personal Collection Products, taga-Barangay San Agustin Sur, Agoo, La Union.
Ti met biktima ket ni Cesario Estelero Galutan, agtawen iti innem a pulo ket walo, taga-Barangay Ayusan, Sta. Lucia, Ilocos Sur.
Alas onse iti bigat ti June 14, 2024, ti biktima ken ti live-in partner-na a ni Evelyn Aunor ket adda iti uneg ti Personal Collection Branch idiay Barangay San Jose, Candon City tapno alaen ti orderda a nadumaduma a klase ti sabon.
Nagpatpatang ti suspek ken ni Evelyn Aunor inaig kadagiti order ket rimsua ti saanda a nagkaawatan idin ta bimmallaet ti biktima.
Nagsinsinnungbat ti suspek ken biktima ngem ti suspek ket nangiruar iti kutsilyo iti jacket na, sa insawangnana ti “ANYA TI PROBLEMAM”.
Iti agdama, isagsaganan ti Candon City Police Station dagiti dokumento para iti pannakaipila iti kaso.
