VIGAN CITY – Awan iti inaramat a helmet ti pimmusay a nagmaneho iti motorsiklo a nasagid ti nagmaneho iti trak idiay Marozo, Narvacan idi April 10, 2021.
Iti pannaki-uman iti Bombo Radyo Vigan ken ni PMaj. Daniel Burgos, OIC iti Narvacan Municipal Police Station, gapu ta agnaed laeng iti nasao a lugar ti pimmusay a ni Delfin Montero, agtawen iti pitopulo ket maysa ket saanen a nagaramat pay iti helmet idi minanehona iti Honda XRM a gappuanan iti pannakasagidna.
Maipalagip a pimmusay idi nagover-take ni Montero ti sarsarunuenna nga elf truck a minaneho ni Jojo Leste, agtawen iti uppat a pulo ket maysa a taga-Quinarayan ket eksakto a nagsikko iti agkurba a paset iti kalsada a gappuanan iti pannakasagidna.
Naipan pay laeng iti ISDH-Narvacan ken nayakar iti Metro Vigan Cooperative Hospital, Bantay ni Montero ngem naideklarar a natay gapu iti sinagabana a dunor iti nadumaduma a paset iti bagina.
Kabayatanna, posible a saanen nga agdarum ti pamilia ti biktima idinto a nakasagana a tumulong ni Leste para iti magastos iti ipupusay ni Montero.
