Natay ti maysa a senior citizen gapu iti pannakalmesna iti Nalvo Beach iti ili ti Sta. Maria, Ilocos Sur.
Ti biktima ket agtawen iti innem a pulo, ambulant vendor, tubo iti Barangay Parayao, Binmaley, Pangasinan, ngem agnanaed iti Barangay Laslasong West iti nasao nga ili.
Iti pannaki-uman ti Bombo Radyo Vigan ken ni PLT. Jenson Refuerzo, napan ti biktima kadua dagiti kabagyanna tapno rambakan ti panagkasangay ti inada idin ta nagiinomda sakbay a napasamak ti insidente.
Alas onse iti agsapa, napan iti kabaybayan ti biktima kadua ti kaanakanna nga agtawen iti sangtapulo ket uppat, ngem nadlaw ti nasao a menor de edad a saanen nga aggargaraw ti biktima iti danum.
Gapu dayta, dagus a nagpaarayat kadagiti kabagyanda tapno maibangkag ket na-CPR ti biktima sakbay a naitaray iti ospital ngem naideklarar a dead on arrival.
Naammuan a ti biktima ket naminduan a daras a naatake.
Saanen nga immanamong ti pamilia ti biktima a maidalan ti bangkayna iti autopsy ta mamatida a natural death ti pannakatayna.
