Natayen idi nasarakan ti maysa a senior citizen a lalaki iti kataltalonan idiay Barangay Sived, Sto. Domingo, Ilocos Sur iti alas kuatro singko idi January 4, 2025.
Ti lalaki ket ni Juan Jimenez Uberita, agtawen iti walopulo ket lima, awanan trabaho nga agnaed iti nasao a lugar.
Segun ti Sto. Domingo Municipal Police Station, napansin ni Ernesto Peoria Bautista, agtawen iti innem a pulo ket pito, mannalon nga agnaed met laeng iti nasao a lugar a nakaidda ti biktima iti kadagan isu a pinukawanna ti apo ti biktima a ni Jomar Uberita tapno kitaen ti lolona ngem isu metten ti pannakaobserbarna a natayen.
Segun ken ni Jomar, alas dos iti malem idi kalman idi napan ti lolona iti taltalon nga asideg iti pagtaenganda tapno iyadayo dagiti kaldingna a mangmangan ti mulana ngem saanen a nagsubli pay.
Naamoan nga idi kallabes ket namindua a na-mild stroke ti biktima.
Naideklarar ti biktima a natay babaen ken ni Dra. Lourdes Guzman a Municipal Health Officer iti ili ti Sto. Domingo ket awan ti senyales ti external injury wenno ebidensya a mangibaga nga adda foul play ti pannatayna.
