Maysa a senior citizen ti nasarakan a natay idiay Barangay Guimod Norte, San Juan, Ilocos Sur.
Nabigbig ti senior citizen a ni Hilario Pescador Villarin, agtawen iti innem a pulo ket innem, agnaed iti nasao a lugar.
Nakaawat ti San Juan Police Station iti tawag manipud ken ni Alfredo Pescador Villarin a nasarakanna ti kabsatna iti pagtaltalunanda iti kardis ken naudi a nakitana a nabartek iti kalmanna.
Segun ken ni Alfredo, binaganna ti kabsatna nga agawid ket nagsungbat met ti “okay” ti natay.
Alas kuatro iti malem, nagsubli ni Alfredo iti nasao a lugar ta ikitana koma no simmurot ti kabsatna ngem isu ti gundaway a natakuatanna a saanen nga aggargaraw ken agang-anges.
Naipan iti ospital ti senior citizen ngem naideklarar a dead on arrival.
Iti pannaki-uman ti Bombo Radyo Vigan ken ni PMAJ. Benjamin Raquedan, ti senior citizen ket dimmalan iti head surgery idi kallabes gapu iti aksidente ken agsagsagaba iti nakaro a sakit.
Malaksid dayta, natakuatanda pay a dua nga aldaw a deretso a nagin-inom.
Awan met ti pakakitaan iti foul play ti pannakatayna.
