VIGAN CITY – Nakemmeg ti maysa a senior citizen idinto a nakalibas dagiti lima a kakaduana kalpasan iti panagkukullangatda wenno panaglabsinda iti Presidential Decree 449 idiay Brgy. Al-Aludig, Santiago.
Segun ti Santiago Municipal Police Station, nabigbig ti nakemmeg a Ramon Pascua Escritor, agtawen iti walopulo ket maysa, naasawaan nga agnaed iti nasao a lugar idinto a dagiti nakalibas a kakaduana ket da Bernie Pedroso Tolentino, agtawen iti uppat a pulo ket tallo nga agnaed met laeng iti nasao a lugar; Carlos Laserna Jr.; Richard Garnace ken Dandy Draculan nga agpapada nga agnaed idiay Brgy. Mambug; ken ni Dinmark Ferrer nga agnaed idiay Brgy. Bigbiga iti ili ti Santiago.
Insayangkat dagiti kameng ti Santiago Municipal Police Station iti anti-illegal gambling operation iti nasao a lugar a gappuanan iti pannakakemmeg ti senior citizen ken pannakalibas dagiti kakaduana.
Naala kenkuana iti maysa a pagpallot a manok; dua a sibibiag a pagpallot a manok, maysa a nadunor a pagpallot a manok, dua a natayen a pagpallot a manok ken dua a tari.
Kabayatanna, ti nakemmeg a suspek ket addan iti kustodiya iti Santiago Police Station tapno dumalan iti husto a proseso.
