VIGAN CITY – Natukkol ti saka ti maysa a senior citizen a nadungpar ti motorsiklo idiay Barangay Poblacion West, San Ildefonso, Ilocos Sur.
Nabigbig ti nagmaneho iti TMX 125 motorcycle a ni Aninias Gadin Magsombol, agtawen iti uppat a pulo ket walo, kinalubbonna ti asawana a ni Jaquelyn Garcia Magsombol, agtawen iti uppat a pulo ket tallo, agnaed iti Barangay Caraisan, Magsingal.
Ti met nagballasiw ket ni Sabel Tabag Torreno, agtawen iti pitopulo, adda parikut ti panagpampanunotna, taga-Barangay Lagatit, Sto. Domingo.
Iti pannaki-uman ti Bombo Radyo Vigan ken ni PLT. Roger Retreta, agdaldalyasat nga agpaabagatan ti motorsiklo iti national highway a sakupen ti Barangay Poblacion East idin ta bigla a bimmallasiw ti senior citizen isu a nadungpar daytoy ti nagmotorsiklo.
Naipaagas iti ospital ti nasao a senior citizen idinto a dagiti nagkalubbon iti motorsiklo a nagsagaba iti minor injuries ket naipan met iti San Ildefosno Rural Health Unit para iti pannakatamingda.
Nakapagpatang metten ti dua a partido a karaman iti aksidente ket napagnumuanda a pagguduaanda iti magastos.
