VIGAN CITY – Pimmusay idi November 24 idiay Candon General Hospital ni Perlasan Buenaventura, agtawen iti pitopulo ket uppat a taga-Sitio Carcarrot, Brgy Salvador 1st, Candon City gapu ti panaginomna iti Termite Killer.
Segun ti kaanakan ti biktima a ni Myrna Ramire Capus, agtawen iti uppat a pulo ket maysa, adda iti pagub-ubraanna a balay idiay Brgy Tablac idin ta tinawaganna ti biktima a kitaen ti anakna nga ay-aywanan ti biktima.
Simmungbat ti biktima nga “okay” laeng ti ubing ket naibagana a naglason isu a pinagawidna ti kaanakanna.
Dinaras ti kaanakanna ti nagawid idin ta nakitana ti bote ti termite killer nga awan nagyanna iti asideg ti katre ti biktima.
Dinamag ti kaannakanna ti biktima no apay nga ininomna ti termite killer ket insungbatna a kayatnan a leppasen ti biagna ta saannan a maibturan ti sakitna.
Pinilitda ti biktima nga agpaospital ngem saanna kayat idi damo ngem kalpasan ti sumagmamano a minutos ket nagbakwar ken narigatan nga umanges isu nga impaagasda iti ospital.
Kabayatanna, pinasingkedan ti kaanakan ti biktima a tallo a tawenen a sagsagabaen ti ikitna ti agbibineg a bukotna isu a marigatan a magna.
