Vigan City – Manarimaan iti pannakataming iti ospital ti maysa a senior citizen ta mapapati a ginedgedna iti tengngedna iti ili ti San Vicente.
Segun ti San Vicente Municipal Police Station, itay ala una y media iti malem itattay ket nakita laengen ti biktima nga adda iti uneg iti pagtaenganna a nakaidda a dara-daran ngem adda puotna apaman a nakita.
Naipan iti Metro Vigan Cooperative Hospital, Bantay babaen kadagiti nagresponde a kameng ti RHU San Vicente para iti pannakatamingna.
Narekubre iti nakapasamakan ti insidente iti maysa a kutsilyo nga adda kaatiddogna a sangapulo ket dua a pulgada a mapapati nga inaramat ti biktima a pinanggedged iti tengngedna.
Iti agdama, agtultuloy iti imbestigasyon dagiti pannakabagi ti linteg inaig iti nasao a pasamak.
