Nakemmeg ti maysa a senior citizen a suspek iti pammagkong idiay Barangay Tampugo, Tagudin, Ilocos Sur.
Nabigbig ti suspek a ni Nelson Lapitan Lambinicio, agtawen iti innem a pulo ket tallo idinto a ti biktima ket ni Jomar Lorenzana, agtawen iti tallopulo, agpada nga agnaed iti nasao a lugar.
Maibasar iti imbestigasyon, pinasingkedan ti maysa a witness nga agiinomda kadagiti karrubana idi nangngegna ti biktima nga agpapaarayat isu a napan iti bangir a balay a pagpukpukkawan ti biktima.
Idi makasangpet, nakitana ti biktima ken ti suspek nga agginginnubal usar iti kutsilyo isu nga inanawana met dagitoy.
Kalpasan ti sumagmamano a minutos, nagsubli ti suspek ket binagkongna ti biktima ken naglibas met ti suspek.
Nangiwayat ti Tagudin Police Station iti hot pursuit operation a puon ti nakakemmegan ti suspek ken narekobre pay ti patadem nga agrukod iti nasurok sangapulo ket dua a pulgada agraman ti apputanna.
Naitaray met iti balay pagagasan ti biktima para iti naan-anay a pannakatamingna.
