VIGAN CITY – Agtaltalinaed iti ospital ni Florida Tabangcura Navarro, agtawen iti pitopulo ket innem a taga-Barangay Naglaoan, Sto. Domingo kalpasan iti pannakapaltogna bayat nga adda iti pagtaenganna.
Iti pannaki-uman ti Bombo Radyo Vigan ken ni PCapt. Joseph Bantullay iti Sto. Domingo Municipal Police Station, namnamaenda a malaingan ti biktima tapno isuna mismo iti mangipakaammo nu bilang nabigbigna ti nangpaltog kenkuana.
Segun ken ni Bantullay, agtultuloy latta iti imbestigasyon inaig ti nasao a pammaltog ta kitkitaendan dagiti CCTV footage iti lugar a mabalin a makatulong iti pannakatunton ti suspek.
Naamoan a bayat iti panagtugaw ti biktima iti terrace iti pagtaenganda ket immasideg ti lalaki a nakahelmet a nagpammarang a gumatang ti kuneho ket insigida a pinaltoganna ti biktima ken naglibas babaen ti motorsiklo.
