Pimmusayen ti senior citizen a nadungpar iti multicab kalpasan nga insalakanna ti ubing a timmaray iti national highway idiay Barangay Poblacion Norte, Sta. Maria idi alas onse singko iti bigat idi September 1, 2024.
Nabigbig ti senior citizen a ni Susana Antolin Abarra, agtawen iti pitopulo, nga agnaed idiay Barangay Nalvo, Sta. Maria idinto a ti nagmaneho ti ti puraw a Rusco Multicab ket ni Daniel Villaguarda Engracia, agtawen iti sangapulo ket siam, baro, holder iti Non- Professional Driver’s License nga agnaed idiay Barangay Acaban, Culaba, Biliran nga agtaltalinaed ita idiay Gabur Norte, Sta. Cruz
Iti pannaki-uman ti Bombo Radyo Vigan ken ni PCapt. Macario Dulawan Jr. manipod Sta. Maria Municipal Police Station, kalkalpas a nakimisa ti senior citizen ket bayat nga addada iti igid iti kalsada ket kellaat lattan a timmaray ti ubing nga agtawen iti lima a napan iti national highway isu a tinarayna nga induron ngem isu metten iti nadungpar iti multicab nga agpapa-amianan a direksyon.
Segun ken ni Dulawan, nadundunor ti senior citizen isu a naipan iti Ilocos Sur District Hospital – Narvacan para iti pannakatamingna ngem iti alas syete iti rabii iti September 1 ket pimmusayen.
Saan met naan-ano ti ubing ken driver ti multicab kalpasan iti aksidente.
Nupay kasta, maisagsaganan ti kaso a sangwen ti driver ti multicab ta ituloy iti reklamo ti pamilia ti biktima.
Palagip ni Dulawan kadagiti nagannak wenno kameng ti pamilia dagiti ubbing a bantayan ida a nalaing tapno maliklikan iti kas iti nasao nga aksidente.
VIDEO – PCAPT. MACARIO DULAWAN JR.
