Nasarakanen ni Alberto Garcia, agtawen iti pitopulo ket lima, taga-Barangay Muraya, San Juan, Ilocos Sur nga immuna a naipadamag a mapukpukaw.
Iti pannaki-uman ti Bombo Radyo Vigan ken ni Randy Ulopani, manugang ni Garcia, adda gayyem ti kasinsinna a nangitawag kenkuana a nakitada ti katuganganna iti paset ti Baracbac, Sinait.
Aduda a nagturong iti lugar tapno sapulen ti katuganganna ket pinukpukkawanda agingga a nasarakanda daytoy a nakatugaw iti sirok ti kayo nga agkakapsut.
Sinalsallabayda nga inyawid ta saan a makapagna ken saan pay a nangnangan.
Idi met saludsodenda no apay a nakadanon idiay ket insungbat ni Garcia nga adda dakkel a tao a nangawis kenkuana.
Maipalagip a ti senior citizen ket pimmanaw iti ayanna nga ospital ket dua a rabii ken dua nga aldaw a napukaw.
