Maysa a senior citizen ti maipilaan ti kaso a direct assault ken panaglabsing ti comelec gun ban iti napasamak a panagprobokar ti merkado publiko ken iti uneg ti istasyon ti pulis idiay ili ti Sta . Maria, Ilocos Sur
Nabigbig ti suspek a ni Edwin Pico agtawen ti innem a pulo ket dua agnaed ti Brgy. Paing, Bantay.
Iti pannaki-uman ti Bombo Radyo Vigan kenni PCapt. Joel Dasargo, nakaawat da ti report nga adda iti mapaspasamak a panagprobokar iti uneg ti tiendaan iso a nagrespondeda ket naranaanda ti suspek a ni Pico a manarimaan a makiriri ken pinagsasaoanna ti dakes ni Jeffrey Lizardo a nakasapgid ti bike a nagluganan ti suspek.
Rimmuar ti imbestigasyon ti PNP a ginandat a bagkongen ti suspek ni Lizardo ngem naagaw ni David Lagmay ti maysa a getteng nga impaimana kadagiti otoridad.
Inimbitaran ti kapulisan dagiti dua iti police station ngem agtultuloy iti panangibabain ken panagsao ti dakes ni Pico no man pay ipasimpa ni Lizardo ti nadadael a bisekleta.
Innayon ni Capt. Dasargo a nakiballaet isuna kadagiti dua ngem iso iti insublatna a pinagsaw-an ti dakes ken inusarna dagiti nagan ti pulitiko a pambutbutengna kenkuana.
Ti agdama, maisagsaganan dagiti naananay a dokumento para iti pannakaipila ti kaso a Direct Assault ken panaglabsing ti Comelec Gun Ban kontra ti senior citizen .
