Kaso a Reckless Imprudence Resulting to Physical Injury and Damaged to Property iti sangwen ti senior citizen a nagmaneho ti kotse gapu iti panangdungparna iti magmagna a senior citizen ken sabali pay a senior citizen a nakabisikleta iti Barangay Road a sakupen idiay Barangay Cabaroan, Magsingal.
Ti pedestrian ket ni Conrad Cordero Combes, agtawen iti innem a pulo ket uppat, naasawaan nga agnaed idiay Barangay Cabaroan, Magsingal; ti nakabisikleta ket ni Benigno Torrejas Tabbada, agtawen iti innem a pulo, naasawaan, mannalon nga agnaed idiay Barangay Dacutan, Magsingal; ken ti nagmaneho ti Maroon Mitsubishi Lancer ket ti Julito Rosario Tabuso, agtawen iti innem a pulo ket tallo, awanan ti driver’s license nga agnaed idiay Barangay Panay Norte, Magsingal.
Iti pannaki-uman ti Bombo Radyo Vigan ken ni PLt. Lyndon Sarmiento a Deputy Chief of Police iti Magsingal Municipal Police Station, magmagna ni Combes nga agpapaammianan idinto a ni Tabbada a nakabisikleta ket adda iti bangir a direksyon idin kellaat a dimteng ti nakakotse a nabartek nga agpapaamianan met laeng ket nasagidna ti magmagna ken inagawna ti linya ti nakabisikleta isu a nadungparna.
Segun ken ni Sarmiento, nadunor iti nadumaduma a paset ti bagi ti pedestrian idinto a na-fracture ti akin-kannigid a saka, ken nadunor ti baba ken akin-kannawan a kiday ti nakabisikleta isu a naipanda iti Ilocos Sur District Hospital – Magsingal para iti pannakatamingda ket iti agdama, naka-ICU ti nagbisikleta.
Kinuna ni Sarmiento a kalpasan ti pasamak ket nagderetso ti nagmaneho ti kotse iti pagtaenganda isu a sinurot dagiti otoridad ket imbagada a nakadungpar a banag a saanna nga impagarup.
Nupay kasta, simmurot ti nagmaneho ti kotse kadagiti otoridad tapno maidalan ti husto a proseso.
VIDEO – PLT. LYNDON SARMIENTO
Inkalintegan ti nagmaneho ti kotse a ni Tabuso a saan a napataray idi napasamak iti aksidente ken saanna a nadlaw nga adda nadungparna ta naannayas iti panagmanehona.
Kabayatanna, ingkari ni Tabuso iti pamilia dagiti nadungparna a makitinnulong para iti magastos iti panagpalaingda.
VIDEO – JULITO ROSARIO TABUSO
