Natay ti maysa a senior citizen a nagbisikleta gapu iti hit-and-run a napasamak iti national highway ti Barangay Langlangca, Candon City, Ilocos Sur.
Ti biktima ket lalaki nga agtawen iti pitopulo ket innem, agnaed iti nasao a lugar.
Ti met suspek ket maysa a lalaki a nakasuot iti Red/Black tshirt ken dark short, a naglugan iti red NMAX 155 motorcycle.
Iti pannaki-uman ti Bombo Radyo Vigan ken ni PLT. Jovelyn Antalan, agbisbisikleta ti senior citizen iti laud a paset ti barangay road iti national highway idin ta agballasiw ket isu met ti gundaway a madungpar isuna ti nagmotorsiklo.
Gapu dayta, naipurwak ti senior citizen manipud iti bisikletana idinto a natulid met ti drayber ti motorsiklo ngem dagus a naglibas a nagpa-amianan a kalpasan ti pasamak.
Mapapati a napaspas ti pataray ti drayber ti motorsiklo isu a saanen a nakapreno idi mapasamak ti aksidente.
Naitaray iti ospital ti biktima ngem saanen a nakalasat, ken permi pay ti pannakadadael ti bisikletana.
Manarimaan metten ti panangkita dagiti pannakabagi ti linteg kadagiti CCTV footage a mabalin a makatulong kadakuada a mangtunton iti suspek.
