Natay ti maysa a senior citizen a nagbisikleta ta nadungpar iti motorsiklo iti provincial road ti Barangay Cabanglutan, San Juan, Ilocos Sur.
Nabigbig ti drayber iti Kawasaki Fury motorcycle a ni Reynaldo Valle Taja, agtawen iti uppat a pulo, construction worker, taga-Barangay Camindoroan, San Juan.
Ti met senior citizen ket ni Victor Ubaldo, agtawen iti pitopulo, taga-Barangay Resurrecion, San Juan.
Iti pannaki-uman ti Bombo Radyo Vigan ken ni PLT Reynald Ramos, Deputy Chief of Police ti San Juan Municipal Police Station, agpapalaud a direksyon ti motorsiklo idin ta ti nagbisikleta a senior citizen ket bigla a bimmallasiw iti kalsada.
Pinadas a linisyan ti nagmotorsiklo ngem nadungparna latta.
Gapu dayta, agpadada a nadunor ket naitaray iti ospital ngem saanen a nakalasat ti senior citizen a mapapati a nakainom idi mapasamak ti aksidente.
Awan ti silaw ti bisikleta ti biktima ken awan pay ti suotna a head gear ken reflectorized vest.
