Pimmusayen ti senior citizen a nagbisikleta a nadungpar ti nagmotorsiklo iti national highway ti Barangay Dardarat, Tagudin, Ilocos Sur.
Nabigbig ti nagmaneho iti Honda Click 125 a motorsiklo a ni Stanley Lorenzana Lazaga Jr., agtawen iti duapulo ket siam, delivery rider ti JNT Express, taga-Cabaroan, Tagudin.
Ti met nagbisikleta nga adda sidecar-na ket ni Fidelino Barnachea Almoite, agtawen iti innem a pulo ket pito, taga-Barangay Bitalag.
Iti pannaki-uman ti Bombo Radyo Vigan ken ni PMAJ. Kleyvan Paycao Dalang, mapapati a saan a nakita ti nagmotorsiklo ti nagbisikleta ta awan ti reflectorized vest wenno silawna.
Nasipnget iti lugar a nakapasamakan ti aksidente ken maibilang nga accident-prone area.
Segun iti witness, nakitana a nainayad nga agpapa-abagatan ti nagbisikleta iti outer lane, idin ta bigla a nakangngeg iti uni ti nagdinnungpar ket nakitana laengen dagiti dua iti kalsada.
Gapu iti dayta, nadunor ti nadumaduma a paset ti bagi dagiti dua a nagmaneho ngem ti nagbisikleta ket pimmusayen idinto a matamtaming iti ospital ti nagmotorsiklo.
