VIGAN CITY – Maisagsaganan ti kaso a Reckless Imprudence Resulting to Homicide a sangwen dagiti nagmaneho iti dua a bus a nakadungpar ken nakaatal iti natay a senior citizen idiay Barangay Mabilbila Sur, Santa.
Nabigbig ti biktima a ni Modesto Banilad Sr., agtawen iti pitopulo ket tallo, agnaed iti Sitio Cabuaan, Barangay Mabilbila Sur, Santa.
Ti drayber iti Fariñas bus ket ni Emerszon Bulahan Garaño, agtawen iti tallopulo ket uppat, agnaed iti Barangay Poblacion 2, Pasuquin, Ilocos Norte idinto a ti drayber iti Florida Bus ket ni Adolfo Binala Gabion, agtawen iti uppat a pulo ket pito, agnaed iti Barangay 8, Acosta, Ilocos Norte.
Iti pannaki-uman ti Bombo Radyo Vigan ken ni Police Executive Master Sergeant Dominic Garcia, chief of police iti Santa Municipal Police Station, kalkalpas a naggimong ti biktima idin ta bimmallasiw ket nadungpar ti Fariñas bus nga agpapaabagatan a direksyon sa napilidan iti simmaruno a Florida bus.
Innayonna nga adu ti tao iti nasao a lugar ngem saandan a napakadaan ta kellaat ti pannakadungpar ti biktima.
Gapu dayta, nagsagaba iti nakaro a dunor iti ulo ken nadumaduma a paset ti bagina ti biktima ket naipaagas iti ospital para ti pannakatamingna ngem naideklarar a dead on arrival.
