VIGAN CITY – Dead on arrival ni Lolita Castro Peralta, agtawen iti pitopulo ket siam, agnaed iti Barangay Poblacion, San Esteban gapu ti pannakadungpar kenkuana ti motorsiklo a minaneho ni Jherico Cabradilla, agtawen iti duapulo ket dua, estudiante, agnaed iti Barangay Apatot, San Esteban.
Iti pannaki-uman ti Bombo Radyo Vigan ken ni PMaj. Aurelio Manantan iti San Esteban Police Station, daldalyasaten ti drayber ti motorsiklo ti agpaabagatan a direksyon idinto a ti biktima a magmagna iti igid ti kalsada ket bigla a bimmallasiw isu a nadungpar ti nakamotorsiklo.
Gapu dayta, naitupa ti ulo ti senior citizen iti semento a puun ti nakatayanna idinto a nadunor ti saka ti nagmaneho iti motorsiklo.
Inlawlawag ni Manantan a saan a nakainom ti drayber idi napasamak iti aksidente idinto a ti senior citizen a biktima ket natakuatan a tunggal pumarbangon ket mapan magna-magna iti igid ti kalsada nga agdawat iti taraon.
Nupay kasta, napagpapatangan a baklayen ti nakadungpar ti amin a magastos iti pannakaitabon ti biktima.
