VIGAN CITY – Kaso nga attempted homicide iti posible a sangwen ni Marcelino Rabino Rabena nga agtawen iti innem a pulo ket siyam, naasawaan, awanan iti pagsapulan ken agnaed idiay Purok 3, Barangay Tamorong, Sta. Catalina gapu iti mapapati a panangbagkong na ken ni Catalino Resurreccion Fragante nga agtawen iti lima pulo ket pito, naasawaan ken agnaed idiay Poblacion, Sta. Catalina idi alas sais iti rabii ti July 7 ngem idi laeng July 8 naipakaammo kadagiti pannakabagi ti linteg.
Segun ken ni Police Chief Master Sergeant Archie Anipot ti Sta. Catalina PNP idi napan nagresponde dagiti kakadua da idiay Barangay Poblacion ket saan nga inbaga dagiti napan da rinespondean nu anya iti pudno a napasamak isu a saan nga insigida a nakemmeg ti suspek ken saan da nga insigida a naimbestigaran ti napasamak.
Agin-inom ti biktima, kadua na ti gayyem na idi nangngeg na nga agap-apa ti putot na ken ti live in partner ti suspek nga agnagan ti Marinel isu a napan na kinita.
Ti dayta a kanito, dimteng met ti suspek ti ayan dagiti agaapa ket nadanun na ti biktima agingga nga isudan a dua iti nagriri ket nagsapul iti kutsilyo ti suspek ket inyawat ni Marinel ti kutsilyo ken ti suspek sa na inbagkong ken ti biktima ngem nakalisi isu a saan a nakaro unay ti dunor a sinagaba na.
