Nagpanawagan ni Senate Minority Leader Alan Peter Cayetano iti Supreme Court a dagus a risuten ti patangan iti kasapulan a bilang ti botos tapno ma-convict ti maysa nga impeached official gapu ta adu pay dagiti karit a sangsangoen ti pagilian.
Kasaruno daytoy ti pannakaipila ti dua a petition a mangkweskwestion wenno agkidkiddaw ti panangipalawag iti kasapulan a bilang ti botos kalpasan nga imbaba ti Senado ti two-thirds threshold manipud iti fixed 16 a napan iti 14.
Segun ken ni Cayetano, nasaysayaat a marisut a dagus ti patangan gapu ta mabalin daytoy a maka-apekto saan laeng iti agdama nga impeachment proceedings ngem uray pay iti sabali a trabaho ti Senado.
Karaman iti posible a maapektaran dagiti patangan iti quorum ti Senado, ratipikasion dagiti treaty, panagbaliw ti Constitution, ken panang-disiplina dagiti senador.
Innayon ni Cayetano a mas sensitibo ti patangan gapu ta adda legal ken political considerations a karaman iti impeachment proceedings.
