VIGAN CITY- Mangisayangkat ti caucus inton umay a lawas dagiti mayorya ti Senado tapnu trataren iti naipasa a kopya ti Consultative Committee report ken plano a pannaka-amyendar ti pamunganayen-linteg tapnu agbalin a pederalismo iti porma ti gobierno.
Ti panagsaludsod ti Bombo Radyo Vigan ken ni Senate President Tito Sotto, inbaga na a posible nga inton Miyerkules wennu Huwebes ket agtataripnong da a miyembro ti Senate majority tapnu adalen a naimbag ti naidatag kadakuada a kopya ti ConCom report tapnu maur-ur iti kapanunutan dagiti sabali a miyembro ti mayorya.
Kagiddan iti dayta ket kiniddaw ti senate president a kabayatan nga ad-adalen da ti framework ti baro a pamunganayen linteg ket mangisayangkat kuman ti information dissemination dagiti mangidurduron ti pederalismo kadagiti tattao tapnu malawlawagan da nu anya ti kaipapanan iti baro a sistema ti gobierno ken nu anya dagiti napintas ken negatibo nga epekto na.
Ni Senate President Tito Sotto ti kangrunaan a sangaili ti maika-siyam a Sangguniang Panlalawigan Legsilative Awareness Week ita a tawen ti hunta provincial nga idaulwan ni Vice Governor Jerry Singson.
