Kinablaawan ni Sen. Imee Marcos ni Pinoy gymnast Carlos Yulo a namindua a nangabak iti balitok a medalya iti 2024 Paris Olympics.
Segun iti senador, dakkel a pammadayaw ti inted ni Yulo iti intero a pagilian isu a rumbeng laeng a maikkan ti pammadayaw iti amin a sakripisiona.
Innayon ni Sen. Marcos, suportaranna ti aniaman nga addang iti senado tapno maikkan ni Yulo iti ekstra a gunggona ken insentibo inton agsubli ditoy pagilian.
Kasaruno dayta, binalakadan ti senador ni Yulo a mangala iti financial mentor tapno nasayaat ti panangmanehar na iti minilion a prize money nga agur-uray kenkuana.
Kinunana a napateg nga adda mangtarabay ken ni Yulo tapno masigurado a saan a masayang ti nagbannuganna.
Mainaig dayta, irekomendar ni Sen. Marcos a mapapigsa ti suporta kadagiti atleta a Pilipino babaen ti tulong ti pribado a sektor.
