Kiniddaw ni Senador Francis Kiko Pangilinan dagiti Local Government Units (LGU’s) nga aktibo nga ipatungpal ti Sagip Saka Act tapno mapapigsa ti matgedan dagiti mannalon ken mangngalap babaen iti direkta a panaggatang ti gobierno dagiti apit-da.
Iti maysa a diyalogo kadua ti 67 Mayors for Good Governance ken opisial ti Department of Agriculture, inaramid ni Pangilinan ti panawagan ket pinasingkedan na a napateg ti akem dagiti lokal a gobierno iti panangipatungpal ti linteg a naipasa idi 2019.
Iti salinong ti Sagip Saka Act, mapalubosan dagiti ahensia ti gobierno ken LGU’s a direkta a gumatang ti produkto manipud kadagiti mannalon ken mangngalap a saan a dumalan iti public bidding tapno maikkat ti papel dagiti middleman ken ngumato ti matgedan.
Kagiddan daytoy ket impalagip ni Pangilinan ti panangipatungpal ti Executive Orders Nos. 100 ken 101 a pinermaan ni Presidente Ferdinand Marcos Jr. a mangikeddeng ti floor price iti irik ken amin nga ahensia ti gobierno ket nasken nga ipatungpal da a buo ti Sagip Saka Act.
