VIGAN CITY – Bwineltaan ti Senado dagiti mangibagbaga nga isuda iti rumbeng na a mapabasol nu apay a na-delay iti pannaka-aprubar iti 2019 national budget a nakaipalaonan iti pondo para iti panangsangaili iti pagilian ti 30th Southeast Asian Games.
Inpatangken ni Senate President Tito Sotto nga immannugot ti Kamara iti naaprubaran a budget.
Nadakamat ni Sotto a naladaw a naipasa kadakuada ti draft ti 2019 national budget ta imbes nga October 1 a maipaima kadakuada ket November 24 nga inpasa dagiti kongresista.
Kabayatanna, inkalintegan met ni Senate minority leader Franklin Drilon nga uray nu delayed iti 2019 national budget, masapul nga adda kuma iti pondo a nailasin para iti panangipatakder kadagiti imprastraktura a maaramat iti regional biennial meet.
