Maguluan ni Senador Loren Legarda no kasano a makabaelan ti Philippine Health Insurance Corporation (PhilHealth) a mangipatungpal a nasayaat iti naingato a benefit package da.
No pay bigbigenna daytoy a positibo a reporma, adu iti makitana a kinakurang ti kinalawag maipapan iti pannakaipatungpalna, kangrunaan ti 50% a panagngato dagiti napili a case rate, ken no ania dagiti kaso a masakupan ken ti nakaitudingan ti badyet.
Segun ti senadora, dadaelenna ti panagtalek ti publiko, a pakaigapuan ti panakaitantan dagiti agkasapulan ti medical care agingga nga agbalin nga emergencies.
Impaganetget ni Senador Legarda ti kasapulan ti nainget ken transparent a proseso ti implementasion.
Napaliiwna nga adu a Pilipino, uray dagiti sakupen ti PhilHealth, ti agtalinaed nga agduadua nga agpa-ospital gapu iti nangato nga out-of-pocket expenses a masansan a lumablabes iti coverage ti PhilHealth.
Gapu dayta, adu a Pilipino ti mangnanama ti government assistance programs wenno loans para ti nabatbati a gastos da ti medikasion.
