Indauluan ni Senador Lito Lapid ti pananglukat ti dialysis center a pinondoanna a masarakan idiay Barangay Sta. Catalina, Minalin, Pampanga.
Segun ken ni Sen. Lapid, dakkel a tulong ti panaglukat ti dialysis center saan laeng a kadagiti taga-Minalin, no diketdi uray kadagiti pasyente nga aggapu iti dadduma nga ili ta nadardarasen iti panagbiahe iti Manila tapno maka-avail ti libre a dialysis service.
Kadua ni Lapid da Cong. Anna York Bondoc, Pampanga Vice Governor Dennis Pineda, dagiti putot ti senador a da Mark Lapid a Chief Operating Officer iti Tourism Infrastructure and Enterprise Zone Authority (TIEZA) ken Bokal Maynard Lapid, Minalin Mayor Philip Naguit, ken dadduma pay a lokal nga opisyal para iti blessings ken opisyal a panaglukat para iti publiko ti dialysis center.
Nangilatang ni Lapid iti P10 million para iti pannakaipatakder ti pasdek ken gimmatang iti munisipyo iti sangapulo ket dua a dialysis machines iti salinong ti Public-Private Partnership kaduada ti St. Marina Margarita Health Care Inc.
