Nagpanawagan ni Senator Imee Marcos iti imbestigasyon idiay Senado kalpasan iti trahedya iti Binaliw Sanitary Landfill idiay Cebu City a nakatayan iti sangapulo ket maysa a tattao.
Iti impilana a Senate Resolution No. 244, gagem ti senadora nga amwen no sumursurot ti landfill iti Republic Act 9003 wenno Ecological Solid Waste Management Act of 2000 ken dadduma pay a linteg iti operasyon ken kinatalged dagiti sanitary landfill.
Umabot pay iti imbestigasyon iti posible a mismanagement, overfilling, regulatory lapses ken koneksyon iti pannakarpuog iti napasamak a magnitude 6.9 a ginggined idi September 2025.
Impaganetget ti senadora a saan a rumbeng a napasamak dayta ken agtultuloy iti mapaspasamak a kas iti nasao a trahedya gapu iti saan a panagtignay iti peggad.
