Kiniddaw ni Senate Deputy Minority Leader Risa Hontiveros ti panagbalin a linteg ti Anti-POGO Act, ken impaganetgetna ti alisto a panagkasapulan iti regional approach iti panangrakrak iti transnational scam operation nga adda pakainaiganna iti offshore gambling.
Segun ken ni Hontiveros, gagem ti gakat a permanente nga iparit ti amin a kapada nga operasyon ti POGO ken dusaen ti asino man a mainaig iti krimen.
Gagemna pay nga ibasura ti tax exemptions nga impaay ti Duterte administration idinto a maikkan iti turay ti Bureau of Internal Revenue a kamaten dagiti buwis a saan a nabayadan.
Inyunay-unay ti senador ti kinapateg ti regional cooperation ti Association of Southeast Asian Nations ta no maikkat ti POGO iti maysa a pagilian, umakar laeng daytoy iti baro kas ti Cambodia ken Myanmar nga ayan dagiti adu nga scam compounds a naipatakder.
