Nagpanawagan ni Senate Committee on Finance Chairman Sherwin Gatchalian iti Inter-Agency Council Against Trafficking (IACAT) a paingeten ti online information ken awareness campaign kontra iti human trafficking, kangrunaan kadagiti agtutubo a Pilipino a nagbalin a biktima ti peke a maidiaya a trabaho iti sabali a pagilian.
Iti panagdenggeg iti 2026 budget iti Department of Justice (DOJ), kiniddaw ni Gatchalian iti Inter-Agency Council Against Trafficking nga ilawlawag nu kasano a makatulong iti panagpangato ti pondoda tapno maipababa ti bilang dagiti kaso ti human trafficking iti pagilian.
Segun ken ni IACAT Executive Director Atty. Hannah Lizette Manlili, mangnamnama iti opisinada iti agduduma nga ahensya kas ti National Bureau of Investigation (NBI) ken Bureau of Immigration tapno mapapigsa ti operasyonda kontra iti human trafficking.
Inlawlawag ni Manalili a ti cyber tip operations monitoring division iti IACAT ket mangisaysayangkat ti online surveillance, saan laeng kadagiti kaso ti sexual abuse wenno exploitation dagiti ubbing, nu diketdi uray kadagiti peke a job advertisements, ilegal a panagampon ken panagilako iti maladaga.
Mangnamnama ni Gatchalian a babaen ti tulong dadagiti nangato a pondo ket mayatiddog pay ti IACAT ti panagaramat kadagiti digital platform tapno madanon iti publiko ken maliklikan ti human trafficking.
