Nadismaya ni Senador Sherwin Gatchalian iti arigna special treatment dagiti opisial ti gobierno ken ni dismissed Bamban Mayor Alice Guo idi napanda sinundo idiay Jakarta, Indonesia.
Segun ken ni Gatchalian, overkill ti nagbalin a trato dagiti otoridad ken Guo nga inyalaanda pay iti chartered flight nupay mabalin met nga inluganda laengen iti commercial flight.
Ngem inlawlawag ni Interior Secretary Benhur Abalos nga awan ti ginastos ti gobierno iti chartered flight ni Guo ta adda gayyemna a nangipabulod kenkuana iti eroplano.
Kabayatanna, pakaragsakan ken pagyamanan ni Gatchalian ti korte ti Capas, Tarlac iti pananganamongda a dumar-ay ni Guo iti imbestigasyon ti Senado inton Lunes.
Manamnama a masukimat ken ni Guo dagiti timmulong kenkuana tapno maipatakder ti POGO hub idiay Bamban ken ti panaglibasna ditoy pagilian.
