Maragsakan ni Senador Sherwin Gatchalian ti pannakaperma ti Republic Act No 12028 wenno Academic Recovery and Accessible Learning Program Act a mangpabileg iti panangparmek ti krisis iti edukasyon iti pagilian.
Nayestablisar iti salinong ti baro a linteg ti ARAL Program a mangted iti national learning interventions a naka-angkla kadagiti sistematiko a tutorial session, naurnos nga intervention plans ken learning resources a buklen dagiti curriculum experts ken reading specialists, mayannatup iti learner-centered approach, epektibo ken husto a wagas ti panagisuro para kadagiti tutor ken agad-adal.
Gagem ti linteg a matulongan dagiti agad-adal manipud Kindergarten agingga Grade 10 manipud kadagiti pampubliko a pagadalan nga agsubli kalpasan ti panagsardengda nga agadal; karaman dagiti saan nga immabot iti minimum proficiency levels a kasapulan iti reading, mathematics, ken science; ken dagiti saan a pumaspasa kadagiti test iti uneg ti school year.
Sakup ti ARAL Program ti essential learning competencies iti salinong ti K-12 Basic Education Curriculum a mangtutuk iti reading ken mathematics para iti Grade 1 agingga 10, ken science para iti Grade 3 agingga Grade 10.
