Nagballaag ni Sen. Alan Peter Cayetano iti posible a nakarkaru a pannakailumlom iti pagilian iti obligasion gapu kadagiti maiserserrek a loan agreements a saan a dumaldalan iti panagadal iti kongreso.
Bayat ti briefing iti Development Budget Coordination Committee mainaig ti gakat ti 2026 National Expenditure Program, impaganetget ni Cayetano nga arigna awanen ti bileg ti kongreso kadagiti foreign-assisted projects nu napirmaanen iti Executive branch.
Innayon ti senador nga uray nalawag iti konstitusyon a kasapulan ti appropriation sakbay nga aggastos iti pondo dagiti umili ket mapilpilitan iti kongreso a mangrespeto kadagiti utang uray saanda nga inaprubaran.
Dinayaw ni Cayetano ti DBCC ken Department of Budget and Management (DBM) iti akemda tunggal agbalbaliw iti financing iti proyekto a mangitunda iti gobierno ti peggad ti arbitration wenno penalty costs.
