VIGAN CITY – Nagturong iti Ilocos Sur da Senador Christopher Bong Go ken Senador Robin Padilla para iti panangipaayda iti tulong kadagiti naapektaran ti ginggined a napasamak idi July 27, 2022.
Ti addang ket iti salinong ti Assistance to Individuals during Crisis Situation wenno AICS.
Naragsak nga impakaammo ni Governor Jerry Singson a sag-sangapulo a ribo a pisos iti maipaay amin kadagiti apektado iti ginggined a partially damage man wenno totally damage.
Segun ti gobernador, gapu ti asi dagiti dua a senador kadagiti naapektaran ket indakdakkeldan iti impaayda iti umabot tallogasut tallopulo ket dua a tattao a nadidigra.
Nagkari ni Senador Robin Padilla kadagiti umili a nu kasano nga inlaban isuna dagiti tattao idi eleksyon ket isu met iti aramidenna iti panagakemnan ket saanna a baybay-an kangrunaan nu madanon ti kas iti napasamak a didigra.
Inyunay-unay met ni Senador Christopher Bong Go nga ikarigatanna iti tumulong agingga kabaelanna ken agtultuloy latta iti suportarna kadagiti umili.
Segun ken ni Go, bisyonan iti tumulong isu a saanto pulos a mauma nga agserbi para kadagiti tattao.
Inlawlawagna a saanda a kabaelan nga agtugtugaw laeng bayat nga adda iti marigrigatan isu a nagturongdan kadagiti naapektaran ti ginggined pakairamananen ti probinsia.
Kabayatanna, adda pay iti grocery packs, bola ti basketball, sapatos, tablet, bisikleta, ken shades para kadagiti agindeg iti probinsia iti inwaras da Senador Bong Go.
