
Naikkan ni Senador Ronald “Bato” Dela Rosa iti 15 nga aldaw a mangi submitar iti written explanation seknan iti naipila a reklamo kontra kenkuana gapu iti napaot a kaawan na iti opisial a trabaho iti Senado.
Segun kenni Senate Ethics Committee Chair Vicente “Tito” Sotto III, pormal a naipatulod ti pakaammo ken ni Dela Rosa kalpasan a naawat ti reklamo ti grupo ti Wag Kang KuCorrupt nga idauluan ni dati a Finance Undersecretary Cielo Magno.
Kinuna ti grupo a ti agtultuloy a kaawan ti senador bayat ti panagawat iti suweldo manipud iti pondo ti publiko ket dereliction of duty. Kiniddawda pay ti pannaka suspende ti binulan a sweldo na maitunos iti prinsipiyo nga “awan ti trabaho, awan ti sweldo.”
Malagip a manmano a nangrugi a timmabuno ni Dela Rosa kadagiti session ti Senado idi Nobiembre 2025 kalpasan dagiti report maipapan iti maipagarup nga arrest warrant ti International Criminal Court (ICC) kontra kenkuana mainaig iti gubat kontra droga.










