VIGAN CITY – Dua ribo uppat a gasut siam a pulo ket lima (2,495) nga estudiante ti naikkan iti self learning kits babaen iti lokal a gobierno ti Santa.
Segun ken ni Santa Mayor Jesus “Popoy” Bueno, naggapu iti Special Education Fund ti pondo a naaramat kadagiti learning modules nga isu ti pagadalan dagiti estudiante ita a maipatungpal ti distance learning.
Babaen iti pannakaipaima iti Santa-LGU ti panagimprenta kadagiti modules ket saanen a marigatan dagiti mangisursuro.
Nupay kasta, kiddawen ni Bueno kadagiti kailianna nga agbayadda ti buwis tapno adda iti mainayon a pondo iti SEF nga isu ti aramatenda kadagiti dadduma pay a pagkasapulan dagiti estudiante.
Maysa kadagiti programa nga italtal-o ti ili ti Santa ti “Santa Educates, Santa Learns” a ti gagemna ket maallukoy dagiti estudiante nga agadal a naimbag.
