Napaingetan ti seguridad iti US capitol mano nga oras sakbay ti maudi nga aldaw ti panagbotos para iti 2024 US Presidential elections ita nga aldaw, Nobyembre 5, oras idiay Amerika.
Naikabil dagiti nangato nga alad iti capital city a Washington, D.C. ken naurnosen dagiti election watch parties iti intero nga estado.
Immunan a nagbotos ti nasurok 77 milion a botante ti Amerika iti early voting para iti mail idinto a ti dadduma ket in-person.
Kabayatanna, manamnama met nga agbalin a historical ti eleksyon iti Amerika ita a tawen uray no asino kadagiti dua a presidential candidate ti mangabak.
Numan bilang a mangabak ni Harris, isuna ti umuna a babai a presidente iti pakasaritaan ti Amerika, umuna nga agbalin a Black woman ken addaan iti South Asian descent nga agtugaw iti kangatoan a puesto iti White House.
Kabayatanna, no mabotosan manen ni Trump, sabsabali met daytoy a historical accomplishment ta isunto ti kaunaan a presidente ti Amerika a convicted iti felony.
Maipalagip a nasentensyaan a guilty ti dati a presidente iti tallopulo ket uppat a bilang ti felony para iti hush money case lima bulanen ti napalabas.
Agdama a sumangsango ni Trump iti sabali pay a felony charges kadagiti dua nga agsina a criminal cases.
