VIGAN CITY – Awan pay laeng iti namonitor dagiti pannakabagi ti linteg a pagilasinan iti panagraut dagiti mapapati a terorista a grupo ditoy probinsiya ken kabangibang a lugar.
Dayta iti pinasingkedan ni Police Major Augusto Cabello, Police community Relations chief ti Ilocos Sur Police Provincial Office iti kangitingitan dagiti agwarwaras a damag iti social media inaig iti pangta iti seguridad ditoy probinsiya ken kabangibang a lugar.
Immuna iti dayta, adda iti damag a mapapati a naggapu ti Northern Luzon Command ti Philippine Army nga adda dagiti terorista nga agiwarnak iti kinadamsak ditoy probinsiya isu a pagan-annaden da dagiti tattao ken inbalakad da a saan pay a mapan kadagiti lugar a pagaad-aduan kas kadagiti mall ken simbaan.
Segun ken ni Cabello, manarimaan pay laeng iti validation da iti nasao nga impormasyon ngem uray kasta ket naka-full alert da latta tapnu insigida a makapagtignay da nu adda man iti mapasamak.
Inbaga na pay a ti kallabes ket awan met ti NPA sightings a nairepeport kadakuada malaksid laeng itay kallabes ta adda dagiti nasiputan dagiti otoridad a NPA sightings kadagiti upland municipalities.
