VIGAN CITY – Natay ni Nico Leo Tica Aruejo, agtawen iti duapulo ket pito, security guard a taga-Barangay San Pablo, Sto. Domingo gapu ti pannakadungpar kenkuana iti maysa a pampasahero a bus idi bimmallasiw iti national highway babaen ti motorsiklo a minanehona.
Nabigbig ti nagmaneho iti bus a ni Esmeraldo Aguilan, agtawen iti limapulo ket innem, drayber a taga-Barangay 17, Tabtabagan, Banna, Ilocos Norte.
Iti pannaki-uman ti Bombo Radyo Vigan ken ni Police Executive Master Sergeant Benito Ponce, naggapu iti barangay road ti San Pablo ti motorsiklo a sumrek iti highway a saan a nagtaltalyaw iti kannawan ken kannigid basar iti CCTV footage idi nadungpar ti bus nga agpapa-abagatan a direksyon.
Gapu ti dayta, naipasirok ti biktima iti bus ken nagsagaba iti nakaro a dunor iti ulo isu a dagus a naipan iti Northside Doctors Hospital ngem natay bayat ti pannakatamingna.
Nupay kasta, maisagsaganan ti kaso a Reckless Imprudence Resulting to Homicide ti drayber ti bus a boluntaryo met a simmuko kalpasan ti pasamak.
