VIGAN CITY – Balligi ti pannakaipatungpal ti search warrant operation idiay Barangay Tamurong, Caoayan kontra iti suspek ti pammaltog idi Mayo 4 a ni John Pamani Tomas, agtawen iti limapulo ket dua nga agnaed iti nasao a barangay ken agdama a nakaibalud iti Caoayan Police Station.
Inlawlawag ni Police Captain Allan Reoliquio a nagapply-da latta iti search warrant tapno naleglegal iti panangiwayatda ti operasyon imbes nga isayangkatda kalpasan ti pannakapasamak idi iti pammaltog.
Ti search warrant ket inruar ti RTC Branch 72, Narvacan a napetsaan iti May 12, 2023 iti kaso a panaglabsing iti Republic Act 10591.
Naala manipud iti pagtaengan ti suspek ti dua a piraso ti unfired 12-gauge ammunition ken maysa a bassit a karton ti armscor a naglaon iti sangapuo ket pito a bala ti calibre 22 ngem nupay kasta, awan a nasarakan ti paltog a naaramat iti pammaltog.
Murder ti kaso a naipila kontra iti suspek ngem naibaban iti kaso a homicide kasta payen a posible a makasoan pay iti kaso a panaglabsing iti RA 10591.