VIGAN CITY – Insayangkat dagiti pannakabagi ti linteg iti search warrant operation iti pagtaengan ti maysa a mangngalap para iti panaglabsingna iti Republic Act 9165 idiay Brgy. Casiber, Santa, Ilocos Sur.
Ti suspek ket ni Randy Retuta Pascua, agtawen ti tallopulo ket siam, naasawaan, mangngalap ken piggery owner nga agnaed iti nasao a lugar ken nabigbig kas Street Level Individual ken provincial Priority Target.
Iti pannakipapatang ti Bombo Radyo Vigan ken ni PCapt. Mark Bryan Corpuz nga OIC iti Santa Municipal Police Station, pinaimbestigaranna nu nainaig iti illegal drug activities ti suspek isu a naidalan ti validation, surveillance ken test buy ket napaneknekanda a pudno iti naidanon kadakuada.
Segun ken ni Corpuz, adda pay iti dimmanon kadakuada t nga agar-aramat iti paltog ti suspek babaen ti panagpaputokna iti lugarda ket napaneknekanda a pudno gapu kadagiti naala a paltog kenkuana.
Naala manipod ti suspek ti maysa a unit iti 12-guage homemade buckshot; maysa a unit iti cal. 22 homemade nga adda magazine-na; sangapulo a live ammunitions iti cal.22; tallo a live ammunitions iti 12 guage shotgun; siam live ammunition iti cal. 45; dua a rifle grenades; maysa a black coin pouch a naglaon iti walo a heat sealed transparent sachet a naglaon iti mapapati a shabu; maysa a karton iti Vivo Y11 a naglaon iti maysa a karton iti e-cigarette nga addaan ti uppat a babassit a transparent plastic sachet nga adda residue-na, siam a transparent plastic sachet, pito a narolyo nga aluminum foil improvised tother, lima a lighter, tallo a getteng; maysa a narolyo nga aluminum foil; maysa a lighter; ken P9,250 a kuarta.
Agdagsen iti 1.5 grams ti illegal drugs a naala manipod ti suspek a mapatta-patta nga aggatad iti P10,200.
Innayon ni Corpuz nga inamin ti suspek nga umaboten ti uppat nga aldaw a saan a naturog isu a pagarupenda a posible a naiballengna iti dadduma a kontrabando nga adda kenkuana.
Naipan ti suspek iti Santa Rural Health Unit para iti physical examination idinto a maisagsaganan ti kaso a maipila kontra kenkuana.
VOICE OF PCAPT. MARK BRYAN CORPUZ
