VIGAN CITY – Naiwayat iti search warrant operation kontra ti maysa a lalaki gapu iti panaglabsingna ti Republic Act 9165 wenno Comprehensive Dangerous Drugs Act of 2002 ken Republic Act 10591 wenno Comprehensive Firearms and Ammunition Regulation Act idiay Brgy. Maratudo, Magsingal.
Iti pannaki-uman ti Bombo Radyo Vigan ken ni PLt. Rodel Ragasa, ti naglabsing ket ni Mindo Marquez Baruela, agtawen iti tallopulo ket walo, addaan ti live-in partner, mannalon nga agnaed iti nasao a lugar.
Segun ken ni Ragasa, naalada iti maysa a fire cartridge para iti caliber 5.56, 17 a heat sealed transparent plastic a mapapati a naglaon iti napagango a marijuana, maysa a brown coin purse, maysa a bassit a coin purse, maysa a small transparent box, 11 a heat sealed transparent plastic sachet ti mapapati a shabu, maysa a lighter, maysa nga improvised scope, maysa nga aluminum foil, pito a live ammunition para iti cal. 5.56 ken dua a live ammunition iti cal.40.
Mapatta-patta nga agdagsen iti mapapati a shabu ti nasurok kumurang maysa a gramo nga aggatad iti P6,800 ken ti naala a mapapati a marijuana ket sangapulo a gramo ti kadagsenna nga aggatad iti P1,200.
Kinuna ni Ragasa a masansan nga agkarit ni Baruela a dati a kameng ti CAFGU wenno Citizen Armed Force Geographical Unit ket iti panagmonitorda naamoan a ti rason ti panagkaritna ket iti panagar-aramatna iti maiparit nga agas ken kasta payen iti panagilakona panagilakona.
Naipan ti akusado iti Magsingal District Hospital para iti physical examination ket maisagsaganan iti kaso a maipila kontra kenkuana.
VC – PLT. RODEL RAGASA
